Policia Kufitare në Portin e Durrësit ka goditur një rast të tentativës për trafikim e armëve të zjarrit, drejt Anglisë.

Në pranga ka përfunduar shtetasi J.K., i cili me furgonin e tij transportonte mallra të ndryshme drejt Anglisë. Policia zbuloi se brenda një tavoline, 35-vjeçari kishte fshehur 8 armë zjarri tip pistoletë, si dhe krehëra me municion luftarak.

Materialet në ngarkim të tij i kaluan prokurorisë për veprime të mëtejshme.

“Si rezultat i kontrollit të imtësishëm, duke përdorur edhe teknikat bashkëkohore për gjetjen e armëve të zjarrit dhe municionit, u bë e mundur që brenda një tavoline të gjendeshin 8 armë zjarri (pistoleta), krehra me municion luftarak dhe aksesorë të ndryshëm armësh, të cilat u sekuestruan në cilësinë e provës materiale, së bashku me 2 aparate celulare dhe një shumë parash”, shton policia.

Në vijim të veprimeve, drejtuesi i furgonit që transportonte mallrat, shtetasi J. K., 35 vjeç, banues në Tiranë, është arrestuar në flagrancë, për veprën penale “Trafikimi i armëve dhe i municionit”.

“Strukturat hetimore të DVP Durrës dhe ato të Departamentit të Policisë Kriminale, në bashkëpunim me SPAK-un, po vijojnë veprimet e thelluara hetimore, për zbardhjen e plotë të këtij rasti të trafikimit të armëve të zjarrit drejt Anglisë, si dhe për identifikimin dhe vënien përpara përgjegjësisë ligjore të shtetasve të tjerë të përfshirë në këtë veprimtari kriminale”, thuhet në njoftimin e policisë./Arbresh.info/