Partia për Drejtësi, Integrim dhe Unitet e quan provokim të rëndë vendosjen e tabelave rrugore në gjuhën greke në jug të Shqipërisë. Në një deklaratë për mediat, PDIU shkon edhe më tej, duke thënë se gjithçka është bërë me lejen e kryeministrit Edi Rama.

“Vendosja e tabelave në greqisht në gjithë zonën e Sarandës, Delvinës e Konispolit, Finiqit e Dropullit përbën kapitullimin e plotë të shtetit shqiptar dhe një provokim të paprecedentë ndaj kombit tonë. Rilindja e pretendimeve “vorioepirote” nën hundën e qeverisë Rama përbën skandalin më të rëndë të 30 viteve të fundit”, thuhet në deklaratë.

PDIU i bën thirrje kryeministrit Rama, por edhe kryeprokurores Arta Marka, Ministrit të Brendshëm Sandër Lleshaj dhe atij të Jashtëm Gent Cakaj që të mos bëhen bashkëpunëtorë në këtë gjë.

“PDIU i bën thirrje kryeministrit Rama, prokurores Marku, ministrave Lleshaj dhe Cakaj, të mos bëhen bashkëpunëtor të Jorgji Zografit, përpara se të jetë vonë! Greqishtja është gjuhë e dytë vetëm në Finiq e Dropull dhe atje tabelat duhen fillimisht në gjuhën shqipe, pastaj në greqisht. Ndërsa vendosja e tabelave greqisht në zonat e tjera, është e palejueshme dhe duhet urgjentisht ndërhyrja e Prokurorisë dhe Qeverisë”, deklaron PDIU./Opinion/