Për t’i dhënë fund ngërçeve institucionale të krijuara me presidentin Ilir Meta, socialistët kanë vendosur të kufizojnë me ligj të paktën 5 prej kompetencave që kreut të shtetit ia njeh kushtetuta.

“Me këtë ligj marrin fund të gjitha ngërçet artificiale.”

Drafti me 45 nene ia kalon kuvendit kompetencën për dekretimin e ministrave, pas precedentit të krijuar me ministrin e Brendshëm, Sandër Lleshaj dhe të Jashtëm, Gent Cakaj.

“Në rast se Presidenti i Republikës nuk nxjerr dekretin për emërimin e ministrit të propozuar nga Kryeministri brenda 7 ditëve nga marrja e propozimit, atëherë Kryeministri ia paraqet propozimin Kuvendit për miratim, pavarësisht nga mungesa e dekretit për emërim”.

Afat i vihet kreut të shtetit edhe për çështjen e betimit të gjyqtarëve, pas përplasjes që shkaktoi Nëntorin e vitit të kaluar refuzimi që Meta i bëri Arta Vorpsit si anëtare e Gjykatës Kushtetuese.

“Në këtë rast, si dhe kur Presidenti nuk shprehet, kandidati shpallet i emëruar dhe fillon detyrën brenda 15 ditëve nga data e vendimit të Këshillit të Lartë Gjyqësor”.

Një tjetër çështje që kufizon kompetencën e Presidentit ka të bëjë edhe me mbajtjen e zgjedhjeve. Në mungesë të një konsensusi mes palëve, siç ishte rasti me mbajtjen e tyre në 30 Qershor, ku dekreti i presidentit nuk u mor parasysh nga mazhoranca, vendimi kalon nga partia më e madhe.

Këtyre ndryshimeve Ilir Meta i ka paraprirë me këngë e valle nga Bylysi, duke e cilësuar përpjekje puçiste nismën e shumicës.

“Zero interes për këto drafte dhe përpjekje puçiste. Ky është një parlament jo kushtetues”.

Në projektligj mazhoranca vë në gjithashtu në lëvizje kuvendin për shpalljen e pamundësisë së ushtrimit të detyrës nga ana e kreut të shtetit./ Tv Klan