Gjatë punimeve të Asamblesë së Përgjithshme të OKB-së, në qëndrimin e tij në Nju Jork, Ministri në Detyrë për Evropën dhe Punët e Jashtme Gent Cakaj, zhvilloi një vizitë në shkollën e Trashëgimisë Shqiptare “Children of the Eagle”, ku është takuar me nxënësit, mësuesit dhe prindërit e kësaj shkolle.

Gjatë kësaj vizite Ministri në Detyrë Cakaj ka dhuruar abetare dhe libra në gjuhën shqipe, duke finalizuar kështu edhe fushatën e përvitshme të Ministrisë për Evopën dhe Punët e Jashtme për shpërndarjen e librave në shkollat shqipe në botë.

“Sikur prindërit e tyre, ata janë në rrugë për të vendosur shembullin më të vlefshëm për ne të gjithë: mund të jesh, në të njëjtën kohë,edhe personalitet me tipare të dalluara ndërkombëtare, edhe njeri me karakter të shquar kombëtar” – shkruan Cakaj në Facebook.

Sipas Kryediplomatit, Ministria për Evropën dhe Punët e Jashtme do të vazhdojë angazhimin e saj ndaj të gjitha zhvillimeve që lidhen me Diasporën si pjesë shumë e rëndësishme dhe e pandarë e Kombit Shqiptar.