Këshilltari i Presidentit të Kosovës, Hashim Thaçit – Blerim Shala, ka thënë se ftesa për t’u bërë pjese e dialogut Kosovë–Serbi, të jetë edhe Lëvizja Vetëvendosje.

“Ftesa t’i dërgohet edhe Vetëvendosjes, të jenë pjesë e procesit”, është shprehur Shala në Pressing.

Tutje, ai tha se shteti i Kosovës është krijim i Shteteve të Bashkuara të Amerikës, rrjedhimisht nuk mund të ketë marrëveshje të dëmshme në Shtëpinë e Bardhë, në dëm të Kosovës.

“SHBA nuk mund të bëjë marrëveshje në dëm të Kosovës. Nuk mund të ndodhë ndryshe. Ky shtet është krijim i SHBA’ve. Nuk ka mundësi të na bëjnë presion SHBA që të nënshkruajmë një marrëveshje të dëmshme për Kosovën”, ka thënë Shala.

Shala gjithashtu tha se as i dërguari special i Shteteve të Bashkuara të Amerikës për dialogun Kosovë–Serbi, Richard Grenell, nuk ka menduar se gjithçka do të rregullohet me një takim në Shtëpinë e Bardhë.

“As Grenell nuk ka menduar se gjithçka do të arrihet me një takim në Shtepinë e Bardhë, ideja e tij ka qenë që të punohet në rrafshin ekonomik në mënyrë që Kosova dhe Serbia të afrohen në mes veti”, shtoi Shala.