Që nga muaji nëntor qytetarët të cilët jetojnë jashtë Prishtinës, për të hyrë në kryeqytet duhet të paguajnë. Por, kjo iniciativë duhet të marrë edhe miratimin e Kuvendit Komunal.

Mirëpo një plan i tillë duket se nuk po gjen mbështetje të plotë brenda kësaj komune.

Egzon Azemi, asamblist nga radhët e VV-së, thotë se një plan i tillë është diskriminim për qytetarët.

Ai për arbresh.info thotë se Vetëvendosje e kishte menduar më herët një plan të ngjashëm, mirëpo jo të kushtëzohej hyrja me pagesë në Prishtinë.

“Një plan i tillë është i padrejtë për shkak që diskriminon jashtëzakonisht shumë qytetarët e qyteteve të tjera. Lëvizja Vetëvendosje e ka pas në plan me e ndërtu parkingun në hyrje të Prishtinës dhe jo me kushtëzu pagesa. Ne pajtohemi që parkimi në qendër të Prishtinës me qenë më i shtrenjtë dhe e kemi votu një rregullore të tillë në mënyrë që veturat mos të kenë kosto të lirë që me u parku në qytet, në mënyrë që të ulet qarkullimi i veturave”, tha Azemi.

Azemi po ashtu thotë se Vetëvendosje nuk do e mbështes këtë ide të kryetarit Ahmeti.

“Por nuk duhet të ketë kësi kosto direket, që nëse nuk je qytetarë i Prishtinës duhesh me pagu, Mendojmë që është vendim diskriminues dhe normalisht që nuk do ta përkrahim”, tha Azemi.

Derisa Vetëvendosje po e kundërshton fuqishëm të parin e Prishtinës për këtë vendim, nga AKR thonë se e kanë ende në diskutim.

Asamblisti nga radhët e AKR-së, Sami Boroci në një prononcim për arbresh.info thotë është diskutuar edhe më parë lirimi i qytetit dhe mundësia për të qarkulluar më lirë në trafikun urban.

Mirëpo, “vendosje e rampës” për qytetarët është pak problematike sipas tij, dhe për këtë ai thotë se ende nuk kanë marrë ndonjë vendim nëse do ta përkrahin këtë iniciativë.

“Ne e kemi diskutu edhe më herët punën e kyçjeS në qytet, edhe ideja e kësaj ka qenë lirimi i qytetit prej komunikacionit prej ngarkesës së madhe. Mirëpo kjo në të njëjtën kohë ka qenë e lidhur edhe me stimulimin e trafikut urban, me ju jep mundësi njerëzve që me e shfrytëzu më shumë trafikun urban. Në kuptimin që me ju vendos rampë njerëzve, është pak më problem edhe një iniciativë të tillë ne jemi duke e diskutuar në grup. Mirëpo nuk kemi ende ndonjë vendim definitiv nëse e përkrahim ose jo, kemi me e pas shumë shpejt qëndrimin tonë dhe do e definojmë në Kuvend”, tha Boroci.

E lidhur me këtë çështje, kryetari i Komunës, Shpend Ahmeti, sqaron se e gjithë kjo do të bëhet për shkak të ndotjes së ajrit nga makinat në stinën e dimrit.

“Meqenëse rrugët janë të ngushta dhe nuk mund të zgjerohen në qendër, atëherë zgjidhja e vetme mbeten ndërtimi i rrugëve alternative (unaza) dhe pagesa e taksës për lëvizje me makinë në pjesë të populluara të qytetit ku ka tollovi dhe që mund të shkaktojnë ndotje”, ka shkruar Ahmeti./arbresh.info/