Ndotja e ajrit në vend mbetet e lartë. Për të krijuar mekanizmat e uljes së kësaj ndotjeje, sot u mbajt tryezë e organizuar nga Ministria e Mjedisit.

Në këtë takim, krahas kërkesave për mbrojtje dhe rigjenerim të florës, u mor vendim që kjo ministri ta hartojë planin për përmirësimin e ajrit.

Njohës të mjedisit thonë se Kosova vazhdon të radhitet me shtetet që kanë ndotjen më të madhe të ajrit, derisa sugjerojnë marrjen e masave urgjente nga të gjitha nivelet dhe institucionet.

Korporata Energjetike e Kosovës, numëri enorm i veturave në Prishtinë dhe lëndët djegëse për ngrohje në shkolla, shtëpi, biznese, janë faktorët kryesorë të ndotjes së mjedisit e sidomos cilësisë jo të mirë të ajrit në vend.

Eksperti i mjedisit Agron Bektashi, thotë se Kosova vazhdon të radhitet me shtetet që kanë ndotjen më të madhe të cilësisë së ajrit, derisa sugjeron ndërmarrjen e masave urgjente nga të gjitha nivelet dhe institucionet.

Pikërisht për cilësinë e ajrit në Kosovë, sfidat dhe veprimet, është mbajtur një tryezë nga Ministria e Mjedisit.

Kryeministri i Kosovës, Ramush Haradinaj, tha se ka disa lajme të mira për këtë çështje.

Për masat që janë marrë në përmirësimin e ajrit kanë folur edhe ministrja e Mjedisit dhe ai i Zhvillimit Ekonomik.

Në këtë tryezë u fol për rëndësinë e gjelbërimit të hapësirave nëpër qytete, ruajtjen e zonave pyjore dhe florës në tërësi, si dhe aspektin e edukimit të qytetarëve për lëndën e parë djegëse që e përdorin, sidomos për ngrohje.