Presidentja e Kosovës, Vjosa Osmani, ka ftuar në takim të gjithë liderët e partive kryesore politike në vend, megjithatë, kjo ftesë iu refuzua nga kryetari i Partisë Demokratike të Kosovës (PDK), Memli Krasniqi.

Në një njoftim në Facebook, Krasniqi ka thënë se e ka refuzuar këtë ftesë për shkak të neglizhencës dhe mungesës së përgjegjësisë së vetë Presidentes në situatën e fundit shqetësuese në veri të vendit.

“Për më tepër, është zhgënjyese dhe e paarsyeshme heshtja e juaj, si Komandante Supreme, për përjashtimin e Forcave të Armatosura të Kosovës nga stërvitja ushtarake e NATO-s “*Defender Europe 23″”, ka shkruar Krasniqi.

Tutje, numri një i PDK-së ka shkruar se me veprimet e saj, Vjosa Osmani është bërë mbështetëse e veprimeve aventureske dhe të papërgjegjshme të Kryeministrit.

“Andaj, i indinjuar me këtë qasje tuaj, me mungesën e sjelljes së përgjegjshme institucionale, ne lartësinë e detyrës suaj si Presidente e Republikës, e shoh të udhës që ta refuzoj ftesën tuaj për takimin e sotëm”, ka thënë ai

Sidoqoftë, Krasniqi është shprehur i gatshëm për takime tjera me të paren e shtetit për të diskutuar për mbajtjen e zgjedhjeve të parakohshme parlamentare në Kosovë.

Propozimi për t’u zhvilluar ky takim i partive në vend me Presidenten, ka ardhur nga kryetari i Aleancës për Ardhmërinë e Kosovës (AAK), Ramush Haradinaj./Arbresh.info