Ministrja e Punëve të Jashtme të Kosovës, Donika Gërvalla, ka mbajtur një konferencë për media së bashku me homologen e saj finlandeze. Gërvalla shprehu kënaqësinë e madhe për pritjen e homologes në Kosovë dhe theksoi se kjo vizitë pasqyron bashkëpunimin e ngushtë mes dy vendeve.

Ajo nënvizoi se një pjesë e diskutimeve u përqendruan në çështjen e sigurisë në Evropë dhe ndikimin rus, duke deklaruar: “Kosova qëndron e bashkuar me Ukrainën.”

Gërvalla shtoi se Kosova ka shumë për të mësuar nga përvoja e Finlandës në procesin e anëtarësimit në NATO dhe riafirmoi përkushtimin për anëtarësimin e Kosovës në këtë aleancë. Ajo gjithashtu përmendi se “ura e Ibrit duhet të hapet,” duke theksuar rëndësinë e lidhjeve të ngushta.

Ministrja Gërvalla kujtoi edhe ish-presidentin e ndjerë finlandez Mahti Ahtissari dhe shprehu mirënjohjen e thellë për mbështetjen që Finlanda ka dhënë ndaj Kosovës./Arbresh.info