Google ADS

Brenda javës policia konfiskon 5 armë në rajonin e Prishtinës, shqipton mbi 3 mijë e 900 gjoba

16:24 | 27 Maj 2024
E.G

Policia e Kosovës në rajonin e Prishtinës gjatë javës së kaluar ka realizuar 208 urdhëresa të gjykatës, prej tyre 63 urdhëresa për vepra penale, ndërsa të tjerat për kundërvajtje, seanca, verifikime.

Sipas njoftimit, gjatë kësaj periudhe kohore janë sekuestruar 5 armë zjarri të llojeve dhe kalibrave të ndryshëm, shkruan Arbresh.info.

“Nga zyrtarët policor të rajonit Prishtinës , gjatë javës së kaluar në lokacione të ndryshme e aksione të ndara, janë realizuar 208 urdhëresa të gjykatës, prej tyre 63 urdhëresa për vepra penale, ndërsa të tjerat për kundërvajtje, seanca, verifikime etj.  Konform urdhëresave, pas përfundimit të procedurave policore, personat e dënuar me burgim janë dërguar për vuajtje të dënimit, ndërsa personat e dënuar me gjobë, janë liruar, pasi të njëjtit kanë kryer obligimet e caktuara në urdhëresa.”, thuhet në njoftim.

Po ashtu, në po të njëjtën periudhë kohore, policia ka shqiptuar 3 mijë e 998 gjoba për kundërvajtje të ndryshme dhe shkelje të kodit rrugor./Arbresh.info/