Ministri i Brendshëm i Kosovës, Xhelal Sveçla, ka deklaruar se është arrestuar drejtori i Administratës në Komunën e Leposaviqit, Nikolla Radimiroviq, nga Policia e Serbisë.

Përmes një postimi në Facebook, Sveçla ka thënë se i arrestuari po mbahet në një stacion policie në Rashkë, shkruan Arbresh.info.

Sipas tij, ai është ndalur vetëm se është pjesë e institucioneve të Kosovës dhe se ka rezistuar ndaj presionit të Beogradit bashkë me familjen e tij.

“Drejtori i Administratës në Komunën e Leposaviqit njëherit djali i Zëvëndësministrit të Ministrisë për Kthim dhe Komunitete Nikolla Radimiroviq, është arrestuar sot nga policia e Serbisë dhe është dërguar në stacionin e policisë serbe në Rashkë. Ai së bashku me të fejuarën e tij po mbahen të arrestuar për arsyen e vetme se Nikolla është pjesë e institucioneve të Republikës së Kosovës dhe se së bashku me babain e tij në vazhdimësi i kanë rezistuar presionit të Beogradit dhe bandave të tyre”, ka shkruar Sveçla në Facebook.

Madje, ministri thotë se ky arrestim është i padrejtë dhe është hakmarrje pas dështimit të tyre për të ndalur vendimin që Kosova të jetë nikoqire e lojërave mesdhetare 2030.

“Ky arrestim i padrejtë është edhe një dëshmi e qasjes destruktive e destabilizuese të qeverisë së Serbisë dhe hakmarrje pas suksesit të Kosovës të arritur dje dhe dështimit të tyre për të ndalur vendimin që Kosova të jetë nikoqire e lojërave mesdhetare 2030”, shtoi Sveçla.

Në fund, Sveçla ka kërkuar nga Serbia që urgjentisht të lirojë Drejtorin Radimiroviq dhe të fejuarën e tij, dhe të ndalojë presionet e aktet e jashtëligjshme ndaj shtetasve të Kosovës

“Kërkojmë nga Beogradi që urgjentisht të lirojë Drejtorin Radimiroviq dhe të fejuarën e tij dhe të ndalojë presionet e aktet e jashtëligjshme ndaj shtetasve të Kosovës, veçanërisht ndaj atyre të etnisë serbe të cilët janë lojal ndaj shtetit të tyre, Republikës së Kosovës, e në shërbim të të gjithë qytetarëve të saj”, ka shtuar tutje Sveçla./Arbresh.info/