Pres që anëtarët e aleancës të bien dakord për rritjen e shpenzimeve të tyre të mbrojtjes në 5% të prodhimit ekonomik, tha sekretari i përgjithshëm i NATO-s, Mark Rutte në Asamblenë Parlamentare të NATO-s në Shtetet e Bashkuara të Amerikës.

Një objektiv i ri do të miratohet në samitin e NATO-s në qytetin holandez, Hagë në qershor. Rritja e shpenzimeve do të kërkonte një angazhim masiv financiar nga vendet e NATO-s.

“Ne kemi nevojë për këtë, sepse përndryshe nuk do t’i arrijmë kurrë objektivat”, tha Rutte në Asamblenë Parlamentare të NATO-s në Dayton, Ohio.

Rutte tha se pret që objektivi më i lartë për shpenzimet e mbrojtjes të miratohet gjatë samitit – një total prej 5%.

Sipas Rutte, më shumë se 3% do të shkojnë për shpenzimet tradicionale të mbrojtjes – dokumentet e brendshme përmendin 3,5%. Pjesa tjetër mund të shkojë për shpenzime të lidhura me mbrojtjen, siç është infrastruktura ushtarake, duke përfshirë linjat hekurudhore, urat e tankeve dhe portet e zgjeruara.

Thirrja e Rutte pasqyron kërkesën e Uashingtonit – që u kërkon vendeve perëndimore të varen më pak nga SHBA-ja për sigurinë – dhe të investojnë më shumë në mbrojtjen e tyre.

Deklarata e tij vjen gati dy javë pas një takimi të ministrave të Jashtëm të NATO-s në Turqi – ku Gjermania mbështeti kërkesën e presidentit të SHBA-së, Donald Trump, që anëtarët e NATO-s të rrisin shpenzimet e mbrojtjes në 5% të produktit të tyre të brendshëm bruto (PBB).