Presidenti i Këshillit Evropian, Charles Michel kërkoi një marrëveshje për Fondin e Rimëkëmbjes së Ekonomisë së Bashkimit Evropian, dy ditë para një samiti të drejtuesve të 27 vendeve.

Michel thotë se arritja e kësaj marrëveshje kërkon vullnet politik.

“Tani është koha. Një marrëveshje është thelbësore. Ne duhet të gjejmë zgjidhje dhe të arrijmë në një marrëveshje për të mirën e qytetarëve tanë. Arritja e një marrëveshje do të kërkojë shumë punë dhe vullnet politik nga të gjithë”, shkruan ai në ftesën e tij për drejtuesit evropianë.

Pjesë e negociatave, një plan rimëkëmbjeje prej 750 miliardë eurosh përbëhet nga 250 miliardë euro kredi dhe kryesisht subvencione në vlerën e 500 miliardë eurove, që nuk do të duhet të rimbursohen nga shtetet përfituese. Ai mbështetet nga buxheti afatgjatë evropian prej 1 trilion e 74 miliardë euro.

Është hera e parë që 27 drejtues të shteteve dhe qeverive të BE-së do të takohen ballë për ballë për një samit në Bruksel që prej muajit shkurt dhe lehtësimit gradual të masave kufizuese lidhur me pandeminë COVID-19.

Negociatat pritet të jenë të gjata dhe të vështira dhe ky samit i jashtëzakonshëm dy ditor mund të mos jetë i fundit. /ATSH/