Presidenti amerikan Donald Trump ka refuzuar propozimet e paraqitura nga Irani në kuadër të negociatave mes dy vendeve, duke i cilësuar ato si “të papranueshme”.

Sipas mediave ndërkombëtare, Teherani kërkoi heqjen e sanksioneve amerikane, përfundimin e luftës në të gjitha frontet dhe garantimin e kontrollit iranian mbi Ngushtica e Hormuzit.

Agjencia iraniane Tasnim, e lidhur me Gardën Revolucionare, raportoi se Irani kërkoi gjithashtu heqjen e menjëhershme të bllokadës detare amerikane pas nënshkrimit të marrëveshjes, si dhe zhbllokimin e aseteve financiare iraniane.

Sipas raportimeve të Axios, kërkesat e Teheranit shkuan përtej pritshmërive të negociatorëve amerikanë. Televizioni shtetëror iranian deklaroi se propozimi i SHBA-ve ishte refuzuar pasi “barazohej me dorëzimin e vendit ndaj kërkesave të tepruara të Trump”.

Në një prononcim për Axios, Trump u shpreh i pakënaqur me përgjigjen iraniane. “Nuk më pëlqeu letra e tyre. Është e papranueshme. Për 47 vjet kanë luajtur lojëra me shumë kombe”, deklaroi ai.

Më herët, presidenti amerikan reagoi edhe në platformën Truth Social, ku e quajti reagimin e Iranit “Tërësisht të papranueshëm!”.

Trump konfirmoi gjithashtu se ka zhvilluar një bisedë telefonike me kryeministrin izraelit Benjamin Netanyahu, gjatë së cilës është diskutuar edhe reagimi i Iranit. “Ishte një bisedë shumë e këndshme. Kemi marrëdhënie të mira”, tha ai, duke shtuar se negociatat me Iranin janë “çështje e tij personale dhe jo e të tjerëve”.