Kryeministri i Kosovës, Albin Kurti, mori pjesë në Konferencën Ndërkombëtare për Cilësinë në Arsim të Lartë, me titull “Ndikimi i mekanizmave të sigurimit të cilësisë në krijimin e një kulture cilësore në arsimin e lartë”, organizuar nga Agjencia e Kosovës për Akreditim.

Kjo ngjarje ka nisur me 1 minutë heshtje në nderim të policit të rënë në detyrë me 24 shtator, Afrim Bunjakut, përcjell Arbresh.info.

Në fjalën e tij, Kurti u shpreh se cilësia në arsimin e lartë në Kosovë qëndron lart mes prioriteteve të Qeverisë, për çka edhe është duke u punuar për modernizimin e arsimit të lartë dhe për vendosjen e kritereve adekuate për ngritjen e mirëmbajtjen e cilësisë së arsimit të lartë.

“Andaj jemi edhe sot këtu, për të përforcuar urat e vjetra dhe për të ndërtuar ura të reja, mes Agjencisë së Kosovës për Akreditim në njërën anë dhe Asociacionit Evropian për Sigurimin e Cilësisë në Arsimin e Lartë (ENQA), Regjistrit Evropian për Sigurimin e Cilësisë në Arsimin e Lartë (EQAR) në anën tjetër, ashtu si edhe Institucioneve të Arsimit të Lartë e partnerëve tanë ndërkombëtarë”, deklaroi kryeministri.

Përmes një komunikate për media nga Zyra e Kryeministrit, bëhet e ditur se Kurti poashtu tregoi se është finalizuar Projektligji për Arsimin e Lartë dhe Ligji për Agjencinë e Kosovës për Akreditim (AKA) i cili garanton pavarësinë institucionale dhe financiare të AKA-së, merr në konsideratë rekomandimet e ENQA-së, si dhe garanton harmonizimin e sistemit tonë të arsimit me Standardet dhe Udhëzuesit Evropian të sigurimit të cilësisë (ESG).

Agjencia e Kosovës për Akreditim e ka gjithë pavarësinë e saj institucionale, vazhdoi kryeministri, teksa shtoi se kemi inkurajuar AKA-në për nxitjen e bashkëpunimit me Institucionet e Arsimit të Lartë dhe për transparencë të plotë, veprime këto që krijojnë parakushtet për anëtarësimin e AKA-së në ENQA dhe EQAR.

Në anën tjetër, Ministrja e Arsimit e ka nënshkruar vendimin për pajtueshmërinë e punimeve dhe publikimeve shkencore me etikën, në hulumtim të stafit akademik të institucioneve të arsimit të lartë (IAL).

“Jemi të përcaktuar për sigurimin e integritetit akademik dhe etik dhe zbatimin e përpiktë të standardeve evropiane të cilësisë të cilat decidivisht thonë që: institucionet (e arsimit të lartë) kanë politika dhe procese që garantojnë dhe përmirësojnë cilësinë e aktiviteteve të tyre, si hulumtimi dhe qeverisja”, përfundoi kryeministri Kurti, duke dhënë zotim për mbështetje.

Në këtë konferencë të pranishëm ishin edhe ministrja e Arsimit, Shkencës, Teknologjisë dhe Inovacionit, Arbërie Nagavci, Kryetarja e Këshillit Shtetëror të Cilësisë, Hasnije Ilazi, Drejtori i Agjencisë së Kosovës për Akreditim, Naim Gashi, Presidenti i EQAR, Stéphane Lauëick, Zëvendëspresidentja e ENQA, Cristina Ghitulica, ambasadorë, deputetë të Komisionit Parlamentar për Arsim dhe staf nga universitetet tona./Arbresh.info