Presidenti i Kosovës, Hashim Thaçi, pas takimit me presidentin e Francës, Emmanuel Macron, e ka takuar edhe ish-kryeministrin francez Alain Juppé, të cilin e ka dekoruar me medaljen “Urdhri i Lirisë”.

Alain Juppé në vitet 1993-1995 ishte ministër i Punëve të Jashtme të Francës, në vitet 1995-1997 ishte Kryeministër i Francës dhe nga viti 2011 kishte shërbyer sërish si ministër i Punëve të Jashtme dhe i Çështjeve Europiane.

“Jam krenar që në emër të qytetarëve të Republikës së Kosovës, sot, dekorova me “Urdhrin e Lirisë” mikun e madh të Kosovës z. Alain Juppé, për kontributin e tij të çmuar për lirinë dhe pavarësinë e vendit tonë”, ka shkruar Thaçi në Facebook.

“Me këtë rast, para miqve të respektuar shpreha mirënjohje të lartë për Francën dhe popullin francez për ndihmën që i kanë dhënë Kosovës”, ka treguar presidenti kosovar.

“Kosova është e bekuar që ka miq të tillë, dhe u jemi gjithmonë mirënjohës!”, është shprehur Thaçi.