Kryeministri i Shqipërisë, Edi Rama, ka zhvilluar një takim me qytetarët në Zvërnec, në prag të organizimit të aktiviteteve për 35-vjetorin e Partisë Socialiste në Vlorë.

Gjatë diskutimit me banorët, Rama iu përgjigj shqetësimeve të ngritura lidhur me çështjet e pronësisë në zonë, duke theksuar se ato janë çështje që i përkasin sistemit gjyqësor dhe jo ekzekutivit.

Ai deklaroi se toka në fjalë është private dhe se qeveria nuk mund të ndërhyjë në marrëveshjet mes pronarëve dhe palëve të tjera.

“Nuk e vendos qeveria, as hipoteka, as agjencitë që merren me pronën. Këtë e vendos vetëm gjykata”, u shpreh Rama.

Kryeministri shtoi se nuk ka pasur takime me pronarët e tokës së përfolur dhe se nuk është në dijeni të marrëveshjeve të tyre me investitorët.

Ai u shpreh gjithashtu se çdo keqkuptim në deklaratat e tij mund të ketë krijuar ndjeshmëri, duke kërkuar mirëkuptim nga qytetarët dhe duke theksuar se fjalët kanë peshë dhe duhet interpretuar saktë.