Ukraina ka njoftuar se ka goditur pesë anije të cilat, sipas saj, po transportonin ngarkesa ilegale në Detin e Azovit dhe në ujërat pranë territoreve të pushtuara nga Rusia.

Komandanti i forcave ukrainase të dronëve tha se anijet dyshohen të jenë përfshirë në transport të grurit ukrainas të “vjedhur”, si dhe në lëvizje të ngarkesave ushtarake dhe karburantit.

Ngjarja vjen një ditë pasi presidenti ukrainas, Volodymyr Zelensky, propozoi bisedime direkte me presidentin rus, Vladimir Putin, për t’i dhënë fund luftës, një ofertë që Moska e ka refuzuar.

Ndërkohë, Ukraina ka konfirmuar se një dron detar i saj ka shpërthyer pranë brigjeve të Rumanisë, në zonën e Detit të Zi, pa raportime për viktima. Autoritetet rumune thanë se shpërthimi ka shkaktuar dëme materiale në një anije dhe në infrastrukturë portuale.

Ministria e Jashtme e Azerbajxhanit ka njoftuar gjithashtu se pesë shtetas të saj janë vrarë gjatë incidenteve që lidhen me sulmet në Detin e Azovit, duke shtuar se anijet e përfshira nuk i përkisnin Azerbajxhanit.

Ukraina thotë se operacionet e saj synojnë infrastrukturën që përdoret për mbështetjen e luftës, ndërsa Rusia ende nuk ka komentuar mbi këto zhvillime./BBC