Spekulimet për një transferim të bujshëm të Florian Wirtz te Chelsea janë shtuar ndjeshëm javët e fundit, me zërat që sugjeronin se mesfushori gjerman mund të ribashkohej me ish-trajnerin e tij, Xabi Alonso.

Megjithatë, eksperti i merkatos Fabrizio Romano ka hedhur poshtë këto pretendime, duke sqaruar se nuk ekziston asnjë negociatë mes Chelseat dhe Liverpoolit për transferimin e 23-vjeçarit gjatë kësaj vere.

Në kanalin e tij në YouTube, Romano pranoi se marrëdhënia mes Alonsos dhe Wirtz është shumë e mirë, pasi të dy kaluan një periudhë të suksesshme së bashku te Bayer Leverkuseni, por theksoi se kjo nuk do të thotë se një transferim është në horizont.

“Jo, Florian Wirtz nuk do të largohet nga Liverpooli këtë verë. Marrëdhënia mes Xabi Alonsos dhe Florian Wirtz është e shkëlqyer. Ata fituan trofe së bashku dhe kaluan momente fantastike te Bayer Leverkuseni, por kaq. Nuk ka asgjë zyrtare dhe nuk ka bisedime”, deklaroi Romano.

Gazetari italian shtoi gjithashtu se profili i Wirtz nuk përputhet me prioritetet aktuale të Chelseat në merkato.

“Chelsea nuk është në kërkim të një lojtari të tillë për momentin. Ndërkohë, Florian Wirtz mbetet një pjesë e rëndësishme e Liverpoolit. Në klub besojnë se sezoni i ardhshëm mund të jetë sezoni i tij i madh me fanellën e kuqe. Nuk ka asnjë lëvizje rreth tij, ndaj harrojeni këtë histori”, shtoi ai.

Wirtz iu bashkua Liverpoolit verën e kaluar në një transferim rekord nga Bundesliga dhe është një nga blerjet më të shtrenjta në historinë e klubit. Në sezonin e tij të parë në Angli, ai regjistroi shtatë gola dhe dhjetë asistime në 49 paraqitje, por hasi vështirësi në përshtatjen me intensitetin fizik të Premier League.

Pavarësisht kritikave që mori në disa ndeshje të mëdha, drejtuesit e Liverpoolit vazhdojnë të kenë besim të plotë te gjermani dhe janë të bindur se pas një sezoni adaptimi dhe një faze të plotë përgatitore, ai do të rikthehet në nivelin e lartë që shfaqi te Bayer Leverkuseni.

Ndërkohë, mbetet për t’u parë se si Wirtz do të përshtatet në sistemin e trajnerit të ri të Liverpoolit, Andoni Iraola, i cili njihet për stilin e tij të lojës me ritëm të lartë dhe presion intensiv./Arbresh.info