Një nxënës 15-vjeçar ka ndërruar jetë pasi është rrëzuar pa ndjenja në një shkollë të mesme në Ferizaj.

Lajmin për media e ka konfirmuar zëdhënësi i Policisë për rajonin e Ferizajit, Kanun Veseli.

Ai ka thënë se ngjarja ka ndodhur sot rreth orës 15:15, në shkollën e mesme “Kuvendi i Arbërit”, në rrugën “Brahim Ademi”, ku një nxënës mashkull, në rrethana ende të panjohura, është rrëzuar pa ndjenja në sallën e edukatës fizike.

Ai është dërguar me urgjencë në Qendrën Emergjente në Ferizaj, ku sipas mjekut kujdestar, pavarësisht trajtimit mjekësor, ka ndërruar jetë.

Në vendin e ngjarjes kanë dalë Njësia e Hetimeve e stacionit, hetuesit rajonalë dhe krimteknikët, të cilët kanë ndërmarrë veprimet e nevojshme hetimore.

“Për të gjitha veprimet është njoftuar prokurori i shtetit, i cili ka urdhëruar që trupi i pajetë të dërgohet në Institutin e Mjekësisë Ligjore (IML) për obduksion. Për informata shtesë do të njoftoheni përmes raportit vijues”, ka theksuar Veseli.