Trajneri i Atlético Madrid, Diego Simeone, është shprehur i kënaqur pas fitores 0-2 ndaj Barcelonës në ndeshjen e parë çerekfinale të UEFA Champions League.

Për trajnerin argjentinas kjo ishte fitorja e parë në stadiumin “Camp Nou”, pas shumë kohësh në krye të klubit madrilen, shkruan Arbresh.info.

“Po, nuk kishim fituar kurrë më parë në këtë stadium. Barcelona është një nga ekipet që luan futbollin më të mirë në Evropë, bashkë me PSG dhe Bayern Munich. Me një punë të mirë kolektive arritëm t’i godasim në momentet kyçe të ndeshjes”, tha ai.

Ai shtoi se goli i dytë i dha më shumë qetësi skuadrës së tij.

“Goli i dytë na dha siguri më të madhe. Është për të ardhur keq që nuk shfrytëzuam edhe më shumë avantazhin.”

Pavarësisht se Atletico kishte vetëm një goditje në portë për një pjesë të lojës, Simeone vlerësoi konkretizimin.

“Futbolli është i mrekullueshëm sepse efikasiteti është kyç. Ka ndeshje kur godasim 30 herë dhe nuk shënojmë. Sot ishim jashtëzakonisht konkretë.”

Sipas tij, skuadra e tij e lexoi mirë lojën dhe dobësitë e kundërshtarit.

“E dinim që linja e tyre e avancuar mund të na jepte mundësi dhe i shfrytëzuam. Ishte e vështirë sepse ata bëjnë presion shumë të mirë. Momenti i kuqit ndryshoi gjithçka, dhe më pas Alexander Sorloth ishte gati për të përfituar, pas një asistimi shumë të mirë nga Nahuel Molina.”

Pavarësisht se rezultati është i pastër dhe ndeshjen e kthimit luan si vendas, Simeone mbeti i kujdesshëm.

“Më njihni, nuk shkoj as shumë përpara, as shumë prapa. E dimë kundër kujt luajmë. Ne jemi të përgatitur, por edhe ata e dinë forcën tonë.”

“Do të mundohemi të bëjmë një ndeshje të madhe në fushën tonë. Kemi nevojë më shumë se kurrë për tifozët tanë. Do të jetë një përballje shumë e vështirë dhe komplekse, si gjithmonë ndaj Barcelonës”, deklaroi Simeone.

Ndeshja e kthimit luhet të martën në “Metropolitano”./Arbresh.info