Trajneri i Liverpool FC, Arne Slot, ka paralajmëruar ekipin e tij në vështirësi se nëse luajnë si në humbjen e thellë në FA Cup ndaj Manchester City të shtunën, atëherë Paris Saint-Germain do t’u shënojë sërish katër gola në ndeshjen e parë të çerekfinales së UEFA Champions League.

Slot, i cili po përballet me presion në rritje nga tifozët e pakënaqur të Liverpoolit, tha se mirëpriti deklaratat e kapitenit Virgil van Dijk pas humbjes, kur ai sugjeroi se disa nga shokët e skuadrës “kishin hequr dorë” në pjesën e dytë, pas një periudhe katastrofike 20-minutëshe rreth pushimit, ku pësuan katër gola. Ndeshja përfundoi 4-0.

Ai këmbënguli se nëse Liverpooli mbështetet te historia e tij e pasur e rezistencës dhe karakterit në Champions League dhe luan si në 35 minutat e para kundër Cityt në “Etihad”, atëherë mund të befasojë PSG-në dhe të kualifikohet në gjysmëfinale.

“Mund t’ju them se nëse kemi ato 20 minuta si ndaj Cityt, nëse i kemi edhe sot në mbrëmje këtu, do të pësojmë sërish katër gola. Sepse lojtarët e PSG-së e dinë si të reagojnë nëse ne kemi një periudhë të tillë loje. Pra, është një sfidë për ne që nga sekonda e parë deri në të fundit të jemi në nivelin që ishim në 35 minutat e para ndaj Cityt. Nëse jo, do të jetë një mbrëmje shumë e vështirë përsëri, si vitin e kaluar, kur merituam plotësisht të humbnim 4-0 këtu, ndoshta edhe më shumë. Por kjo është bukuria e futbollit. Në minutën e 85-të shënuam një gol dhe menduam: ‘uou, kjo ishte një vjedhje’”, tha Slot në Parc des Princes të martën në mbrëmje.

Liverpooli, falë një paraqitjeje të shkëlqyer të portierit Alisson, kishte arritur një fitore 1-0 në Francë në fazën e 1/8-ve sezonin e kaluar, por më pas humbi me të njëjtin rezultat në “Anfield” dhe u eliminua pas penalltive.

Slot pranoi se PSG-ja, që më pas fitoi për herë të parë Champions League, është tani një skuadër edhe më e fortë, ndërsa Liverpooli është në një fazë tranzicioni, e simbolizuar nga afrimet e Florian Wirtz, Hugo Ekitike dhe Alexander Isak.

Isak ka kaluar pjesën më të madhe të sezonit të tij të parë në Angli i dëmtuar, por ka udhëtuar në Paris dhe Slot tha se, edhe pse nuk do të jetë titullar, mund të japë kontribut nga stoli në ndeshjen e parë.

“Ajo që tha Virgjili ka shumë kuptim”, shtoi Slot. “Është një ndjesi krejtësisht normale ajo që ai ndau pas ndeshjes. Ishte ndjesia e çdo lojtari, çdo anëtari të stafit dhe çdo tifozi të Liverpoolit. Të gjithë ishin të zhgënjyer nga ai rezultat. Tani duhet të tregojmë përsëri atë mentalitet. Të vazhdojmë përpara dhe të ngrihemi pas zhgënjimit, sepse ky klub ka treguar shumë herë se mund të bëjë gjëra të jashtëzakonshme në rrethana të vështira”, përfundoi Arne Slot./Arbresh.info