Luftohet për play-off dhe mbijetesë, nesër tri përballje të zjarrta në elitën e basketbollit kosovar

14:29 | 7 Prill 2026
D.H

Mesjava shënon fundin e garave të rregullta, por edhe fundin e dilemave.

Vetëm minutat e fundit do të përcaktojnë se kush do të renditet në vendin e katërt, kush do të jetë në vendin e gjashtë dhe kush do të bie nga Superliga.

Ky ishte një nga edicionet më të ‘çmendura’ në elitë me luftë deri në fund.

Për vendin e katërt luajnë Peja dhe Ylli, ndërsa shumë interesant është gara në fund, ku Prishtina ka 37 pikë, një më shumë se Rahoveci 029 e Vëllaznimi.

Të mërkurën janë tri ndeshje vendimtare, derisa të enjten përballen Bashkimi dhe Bora që kanë siguruar “Play-off”-in, nga vendi i dytë, përkatësisht tretë.

Trepça – Sigal Prishtina është përballja e rivalëve të vjetër, por që ndodhen në pozita të ndryshme. Kampionët janë liderë me 51 pikë, kurse bardhekaltrit kanë 37. Derisa mitrovicasit kanë siguruar vendin e parë, prishtinasit po luftojnë për vendin e gjashtë, që siguron pozitën e fundit për “Play-off”.

Vëllaznimi – Peja është sfida tjetër shumë interesante. Kuqezinjtë kanë 36 pikë dhe ende janë po luftojnë për mbijetesë e “Play-off”, derisa verdhezinjtë kanë 38 pikë dhe me fitore synojnë vendin e katërt, që siguron epërsinë e terrenit vendas në çerekfinale.

Golden Eagle Ylli – Rahoveci 029 po ashtu është përballje shumë e rëndësishme për të dy skuadrat. Për therandasit për vendin e katërt, ku momentalisht kanë 39 pikë, kurse ‘Vreshtarët’ kanë 36 dhe po luftojnë për mbijetesë.

Të enjten është sfida e fundit, Bashkimi-Bora. Portokallezinjtë me 46 pikë e prishtinasit me 41, kanë siguruar garat shtesë.

Vendi i parë dhe dytë e kanë të siguruar gjysmëfinalet e “Play-off”-it, kurse në çerekfinale ndeshen vendi i tretë me të gjashtin dhe i katërti me të pestin.