Qeveria shqiptare ka reaguar me shqetësim dhe ka dënuar ashpër incidentin e rëndë ushtarak ku një raketë balistike e lëshuar nga Republika Islamike e Iranit hyri në hapësirën ajrore të Turqisë. Përmes një deklarate zyrtare, Ministria për Evropën dhe Punët e Jashtme (MEPJ) e përshkroi këtë veprim si një akt të papërgjegjshëm që kërcënon arkitekturën e sigurisë në rajon.

Në qëndrimin e saj, diplomacia shqiptare rikonfirmoi lidhjet e forta me shtetin turk, duke e cilësuar atë jo vetëm një aleat brenda strukturave të Atlantikut të Veriut, por edhe një partner strategjik të pazëvendësueshëm për Shqipërinë.

“Shqipëria qëndron në solidaritet të plotë me Turqinë,” theksohet në reagimin e MEPJ, duke dërguar një mesazh të qartë mbështetjeje në një moment të rritjes së ndjeshme të tensioneve në Lindjen e Mesme dhe në kufijtë e Evropës.

Suksesi i mburojës raketore të NATO-s

Një pikë kyçe e deklaratës së Tiranës ishte vlerësimi maksimal për efikasitetin e sistemit të mbrojtjes ajrore të NATO-s. Tirana përshëndeti reagimin e menjëhershëm të kapaciteteve kundër-raketore të Aleancës, të cilat arritën të gjurmojnë dhe të neutralizojnë raketën balistike iraniane përpara se ajo të shkaktonte dëme.

Sipas autoriteteve shqiptare, funksionimi i kësaj mburoje shmangu një tragjedi të mundshme, duke mbrojtur jetët e popullsisë civile dhe duke garantuar paprekshmërinë e territorit të Aleancës.

Apeli për parandalim dhe siguri kolektive

Ministria e Jashtme e Shqipërisë e vendosi këtë incident në një kontekst më të gjerë gjeopolitik, duke paralajmëruar se sulme të tilla nga ana e Teheranit mbartin një rrezik të lartë për destabilizimin e mëtejshëm të një rajoni tashmë të trazuar.

Në përfundim të reagimit të saj, MEPJ theksoi domosdoshmërinë e mbajtjes në gatishmëri të lartë të forcave të aleancës.

“Një mbrojtje e fortë dhe aftësitë parandaluese mbeten thelbësore për sigurinë kolektive të NATO-s,” mbyllet deklarata, duke nënvizuar se mbrojtja e çdo pëllëmbe të territorit aleat mbetet prioriteti absolut./rtsh