Shtetet e Bashkuara duan që Europa të marrë përsipër shumicën e aftësive mbrojtëse konvencionale të NATO-s, nga inteligjenca te raketat, deri në vitin 2027, thanë zyrtarët e Pentagonit para diplomatëve në Uashington këtë javë, një afat i shkurtër që disa zyrtarëve europianë iu duk jorealist.

Mesazhi, i rrëfyer nga pesë burime të njohura me diskutimin – përfshirë edhe një zyrtar amerikan – u përcoll gjatë një takimi në Uashington këtë javë mes stafit të Pentagonit që mbikëqyr politikën e NATO-s dhe disa delegacioneve europiane, shkruan Reuters.

Zhvendosja e kësaj barre nga SHBA-të te anëtarët europianë të Organizatës së Traktatit të Atlantikut të Veriut do të ndryshonte në mënyrë dramatike mënyrën se si Shtetet e Bashkuara, një anëtar themelues i aleancës së pasluftës, punojnë me partnerët e tyre më të rëndësishëm ushtarakë. Në takim, zyrtarët e Pentagonit treguan se Uashingtoni nuk ishte ende i kënaqur me hapat që Europa ka bërë për të rritur aftësitë e saj mbrojtëse që nga pushtimi i zgjeruar i Ukrainës nga Rusia në vitin 2022.

Zyrtarët amerikanë u thanë homologëve të tyre se nëse Europa nuk e përmbush afatin e vitit 2027, SHBA-të mund të ndalojnë së marrë pjesë në disa mekanizma koordinimi mbrojtës të NATO-s, thanë burimet, të cilët kërkuan anonimitet për të diskutuar bisedat private.

Disa zyrtarë në Capitol Hill janë të vetëdijshëm dhe të shqetësuar për mesazhin e Pentagonit për europianët, tha një zyrtar amerikan.

Nuk ka qartësi se si do ta matin progresin e NATO’s

Aftësitë konvencionale të mbrojtjes përfshijnë asete jo-bërthamore nga trupat te armët dhe zyrtarët nuk shpjeguan se si SHBA-të do ta matin progresin e Europës drejt mbajtjes së pjesës më të madhe të barrës.

Gjithashtu nuk ishte e qartë nëse afati i vitit 2027 përfaqësonte qëndrimin e administratës Trump apo vetëm pikëpamjet e disa zyrtarëve të Pentagonit. Ka mosmarrëveshje të konsiderueshme në Uashington mbi rolin ushtarak që SHBA-të duhet të luajnë në Europë.

Disa zyrtarë europianë thanë se një afat deri në vitin 2027 nuk ishte realist, pavarësisht se si Uashingtoni e mat progresin, pasi Europës i duhen më shumë sesa para dhe vullnet politik për të zëvendësuar disa aftësi të SHBA-së në një afat të shkurtër.

Ndër sfida të tjera, aleatët e NATO-s përballen me prapambetje në prodhim për pajisjet ushtarake që po përpiqen të blejnë. Ndërsa zyrtarët amerikanë e kanë inkurajuar Europën të blejë më shumë materiale të prodhuara në SHBA, disa nga armët dhe sistemet mbrojtëse më të çmuara të prodhuara në SHBA do të duheshin vite për t’u dorëzuar nëse porositen sot.