Hoxha priti në takim kryeprokurorin e SPAK-ut Altin Dumani, e njoftoi për angazhimet profesionale të PK-së

15:59 | 1 Tetor 2025
H.E

Sot drejtori i Përgjithshëm i Policisë së Kosovës kolonel Gazmend Hoxha, me bashkëpunëtorët e tij, priti në një takim zyrtar kryeprokurorin e Strukturës së Posaçme Kundër Korrupsionit dhe Krimit të Organizuar (SPAK) Altin Dumani, nga Republika e Shqipërisë.

Drejtori Hoxha fillimisht i dëshiroi mirëseardhje Dumani dhe njëherit e njoftoi për punën, angazhimet profesionale të PK-së kundër krimit të organizuar dhe korrupsionit, si dhe për bashkëpunimin që PK-ja ka me autoritetet e Shqipërisë.

Në anën tjetër Dumani falënderoi për mikpritjen e ngrohtë dhe vlerësoi lart gatishmërinë për të ndarë përvoja dhe ide të vlefshme me interes të përbashkët.

Të dy palët u zotuan se do të vazhdojnë angazhimin me seriozitet dhe përkushtim, duke identifikuar mundësi të reja për bashkëpunim dhe zhvillim të ndërsjellë./Arbresh.info