Ukraina pret që deri muajin e ardhshëm të ketë një fond rreth 3.5 miliardë dollarë për të blerë armë nga Shtetet e Bashkuara dhe për të mbështetur luftën e saj mbi trevjeçare kundër pushtimit të gjithanshëm rus, tha presidenti ukrainas Volodymyr Zelenskyy.

Marrëveshja financiare e njohur si ‘Lista e Kërkesave të Prioritetit për Ukrainën’, ose ‘PURL’, mbledh kontribute nga anëtarët e NATO-s, përveç Shteteve të Bashkuara, për të blerë armë, municione dhe pajisje amerikane.

“Ne kemi marrë më shumë se 2 miliardë dollarë nga partnerët tanë posaçërisht për programin PURL,” tha Zelenskyy në një konferencë të përbashkët për shtyp në Kiev me presidenten e Parlamentit Evropian, Roberta Metsola. “Do të marrim para shtesë në tetor. Mendoj se do të kemi diku rreth 3.5–3.6 miliardë dollarë”, raporton AP.

Zelenskyy nuk dha hollësi se cilat armë do të përfshinte dërgesa e parë, por tha se ato me siguri do të përmbanin raketa për sistemet e mbrojtjes ajrore ‘Patriot’ dhe municione për sistemet e artilerisë raketore me lëvizshmëri të lartë, ose HIMARS.

Një përfundim i luftës duket ende i largët, pavarësisht muajve të përpjekjeve për paqe të udhëhequra nga SHBA.

Sistemet Patriot janë jetike për t’u mbrojtur nga sulmet raketore ruse. Sistemet HIMARS kanë forcuar ndjeshëm aftësinë e ushtrisë ukrainase për goditje precize./rtk