Organizata e Veteranëve të Luftës, Shoqata e Invalidëve dhe Shoqata e Familjeve të Dëshmorëve të UÇK-së kanë reaguar ashpër për praninë në vend të ndihmësdrejtorit të Zyrës për Kosovën në qeverinë serbe, Igor Popoviq.

I njëjti është ndaluar sonte nga Policia e Kosovës në Bërnjak dhe po dërgohet në stacion për procedura të mëtejshme.

Mbajti fjalim fyes kundër UÇK-së, policia ndalon Igor Popoviqin

OVL UÇK, SHIL dhe SHFD thonë se Popoviqi është i njohur për gjuhë fyese dhe urrejtje ndaj UÇK-së dhe luftës së tyre çlirimtare.

“Ky është mentaliteti i vartësve të Millosheviqit, që sot përfaqësohet nga presidenti i Serbisë, Aleksandër Vuçiq, ish-ministër i atij regjimi gjenocidal. Çdo tentativë për të provokuar, për të njollosur UÇK-në dhe për të përdorur territorin e Kosovës për propagandë antikombëtare është e papranueshme dhe duhet ndalur me vendosmëri”, thuhet në reagim.

Në reagim shtohet se kategoritë e dala nga lufta, nuk do të heshtin ndaj fyerjeve që synojnë të fyejnë sakrificën për liri dhe gjakun e dëshmorëve dhe martirëve.