Cristiano Ronaldo ka vendosur të qëndrojë te Al-Nassr, duke refuzuar mundësinë për një tjetër aventurë në futbollin evropian apo amerikan. Superylli portugez ka nënshkruar një kontratë të re, e cila sipas shumë burimeve është ndër më të mëdhatë që sporti ka parë ndonjëherë.

Ronaldo e ka shprehur disa herë publikisht kënaqësinë që po përjeton në Arabinë Saudite, duke theksuar se për të nuk ka të bëjë vetëm me paratë apo futbollin, por me dëshirën për të ndihmuar në zhvillimin e vendit.

Ai ka deklaruar se liga saudite tashmë është ndër pesë më të mirat në botë dhe u ka bërë thirrje të gjithëve ta vizitojnë vendin.

Megjithatë, sipas raportimeve të gazetës spanjolle Marca, paratë kanë luajtur një rol të rëndësishëm: Ronaldo pritet të fitojë mes 180 dhe 200 milionë euro në sezon, ndërsa kontrata përfshin edhe një pjesë të pronësisë së klubit Al-Nassr, pas rinovimit.

Sipas vlerësimeve të ndryshme, vlera totale e kontratës për dy vjet llogaritet të jetë rreth 500 milionë funte (rreth 580 milionë euro ) – duke e bërë atë kontratën më të madhe në histori për të ardhurat vjetore në sport.

Kontrata që thyen rekorde… por jo të gjitha

Megjithëse Cristiano Ronaldo kryeson për pagën më të lartë vjetore, kontrata e tij nuk është më e madhja në histori për vlerën totale. Në krye qëndron Juan Soto, lojtari i bejsbollit i cili nënshkroi një kontratë 15-vjeçare me New York Mets, me vlerë 765 milionë dollarë.

Para tij, rekordin e mbante Shohei Ohtani, një tjetër yll i MLB-së, me kontratë 700 milionë dollarëshe me Los Angeles Dodgers, të nënshkruar në vitin 2024.

Dominimi i sportistëve amerikanë – dhe përjashtimi që bëjnë Ronaldo e Messi

Në listat e kontratave më të mëdha në sport, vetëm Cristiano Ronaldo dhe Lionel Messi përfaqësojnë futbollin. Ata zënë dy nga pesë pozitat kryesore për pagën mesatare vjetore, por jashtë tyre, asnjë futbollist tjetër nuk është në 100 marrëveshjet më të mëdha në histori.

Në këto lista dominojnë sportet amerikane, sidomos bejsbolli (MLB), basketbolli (NBA) dhe futbolli amerikan (NFL). Një faktor që favorizon bejsbollin është mungesa e kufizimit të pagave, ndryshe nga NBA dhe NFL që operojnë me “salary caps”.

Ronaldo, një anomali që sfidon të gjitha ligat

Rasti i Ronaldos është i jashtëzakonshëm për futbollin botëror. Edhe në një treg që nuk është i njohur për kontrata të mëdha si Liga Saudite, ai arrin të marrë një shumë që e tejkalon pagën e çdo sportisti tjetër aktiv, duke e konfirmuar statusin e tij si ikonë globale dhe magnet ekonomik.

Në një kohë kur sportistët më të paguar vijnë nga ligat amerikane, Ronaldo mbetet përjashtimi madhështor që sfidon çdo rregull. /Telegrafi/