Huijsen në “radarin” e Real Madridit

16:24 | 13 Maj 2025
D.H

Pas një sezoni të shkëlqyer me Bornemouthin, mbrojtësi spanjoll, Dean Huijsen është duke u vëzhguar nga shumë klube për ta transferuar futbollistin gjatë merkatos së verës.

Pas Chelseas, Liverpool dhe Arsenalit, në garë për 20-vjeçarin spanjoll, ka hyrë edhe Real Madridi, shkruan Arbersh.info.

Këtë e ka bërë të ditur edhe vetë eksperti i transferimeve, Fabrizio Romano.

Sipas tij, Real Madridi është në dijeni se lojtari ëndërron, një transferim te “Los Blancos”, ndërsa po zhvillohen bisedime të brendshme me trajnerin Xabi Alonso për një qendërmbrojtës të ri.

Gjithashtu mediat e huaja kanë shkruar se presidenti i Real Madridit, Florentino Perez i ka premtuar trajnerit të ardhshëm që klubi do ta transferojë së paku një qendërmbrojtës këtë merkato.

Chelsea, Liverpool dhe Arsenal janë gjithashtu të gatshëm të aktivizojnë klauzolën prej 50 milionë £ për ta mbyllur marrëveshjen këtë muaj, duke u përpjekur të arrijnë një akord me përfaqësuesit e lojtarit.

Huijsen është transferuar nga Roma tek Bornemouthi verën e kaluar, ku në Premier League këtë sezon ka luajtur 30 ndeshje dhe ka shënuar tre gola dhe dhuroi një asistim. Gjithashtu performancat e tij kanë qenë të shkëlqyera në mbrojtje.

Ai ka një kontratë që e mban të lidhur me klubin deri në vitin 2030 dhe për këtë secili klub që dëshiron ta ketë në pronësi talentin spanjoll, duhet ta paguaj klauzolën e tij./Arbresh.info

 

 

Shpërndaje në rrjete sociale