Sektori i Hetimeve të Stacionit të Policisë në Prizren – Veri është duke zhvilluar hetime lidhur me një rast të vjedhjes së rëndë, e cila ka ndodhur më 2 shkurt 2025, rreth orës 17:00, në xhaminë e fshatit Korishë, në Prizren.

Sipas hetimeve, një person i dyshuar, ende i paidentifikuar, ka hyrë në objektin e xhamisë dhe ka marrë në mënyrë të kundërligjshme para nga kasa e saj, duke u larguar menjëherë nga vendi i ngjarjes.

Pamjet nga kamerat e sigurisë e kanë regjistruar të dyshuarin duke hyrë në xhami, dhe policia ka siguruar një fotografi të tij. Megjithatë, deri më tani nuk është arritur identifikimi i personit në fjalë.

Me autorizimin e Prokurorisë Themelore në Prizren, bazuar në nenin 76, paragrafi 2 të KPPRK-së, policia ka miratuar publikimin e fotografisë së të dyshuarit në media dhe rrjete sociale, duke kërkuar ndihmën e qytetarëve për identifikimin dhe lokalizimin e tij.