Komisionerja për Zgjerimin në Bashkimin Evropian, Marta Kos do të zhvillojë një vizitë zyrtare në Shqipëri më 13 mars.

Ajo pritet të takohet fillimisht me presidentin e Shqipërisë, Bajram Begaj. Më pas, Kos do të marrë pjesë në një konferencë të përbashkët për shtyp me kryeministrin Edi Rama.

Komisionerja për Zgjerimin është e ftuar në Konferencën e Kolegjit të Evropës: “Zgjerimi i BE-së dhe shoqëritë elastike në Ballkanin Perëndimor: forcimi i shoqërisë civile, barazia gjinore dhe pjesëmarrja e të rinjve”.

Zyrtarja evropiane pritet të takohet gjithashtu me kryeparlamentaren Elisa Spiropali dhe nënkryetarin Agron Gjerkmarkaj, kryetaren e Komisionit për Çështjet e BE-së Jorida Tabaku dhe Kreun e Grupit të PD-së Gazment Bardhi.

Gjatë muajit shkurt, Kos theksoi nevojën për të përshpejtuar procesin e integrimit në Bashkimin Evropian për vendet që synojnë anëtarësimin./abcnews.al