Murati: Opozita po ia huq, për 8 muaj mbi 8 mijë ndërmarrje të reja

21:30 | 3 Tetor 2024
K.B

Ministri i Financave, Punës dhe Transfereve, Hekuran Murati ka thënë se për 8 muaj në Kosovë janë regjistruar 8,021 ndërmarrje të reja, derisa pret që sipas dinamikës deri në fund të vitit të arrihet numri i 12 mijë ndërmarrjeve të reja.

Ministri ka ndarë statistikat nga ASK-ja, ku ka thënë se opozita po bën huqjen e radhës duke pretenduar se në vitin 2023 ka pasur rënie të numrit të bizneseve.

“Sipas ASK-së, gjatë vitit 2023 janë shtuar 9,807 ndërmarrje të reja neto, pra 11,409 ndërmarrje të regjistruara të reja dhe 1,602 ndërmarrje të shuara. I njëjti trend ka vazhduar edhe në vitin 2024, ku për 8 muajt e parë kemi 8,021 ndërmarrje të reja të regjistruara, apo mesatarisht 1 mijë regjistrime të reja në muaj. Kjo na bën të besojmë që deri në fund të vitit do të kemi rreth 12 mijë ndërmarrje të reja të regjistruara”, ka shkruar Murati në Facebook./Arbresh.info/