Nëntë objekte të Postës së Serbisë në veri janë mbyllur gjatë një aksioni policor gjatë ditës.

Lidhur me këtë ka reaguar edhe ambasada e Shteteve të Bashkuara të Amerikës duke shprehur zhgënjim, shkruan Arbresh.info.

“Qeveria e SHBA është shprehur thellësisht e zhgënjyer nga veprimet e njëanshme dhe të pakoordinuara të ndërmarra nga Qeveria e Kosovës kundër degëve të postave serbe në veri të Kosovës.”, thuhet në njoftim.

Sipas njoftimit, këto veprime i vënë në rrezik qytetarët dhe ushtarët e KFOR-it.

“Veprimet e pakoordinuara të Kosovës i vënë qytetarët e Kosovës dhe ushtarët e KFOR-it në rrezik më të madh, përshkallëzojnë në mënyrë të panevojshme tensionet rajonale dhe minojnë reputacionin e Kosovës si një partner i besueshëm ndërkombëtar.”, thuhet tutje.

Mes të tjerash, SHBA i ka bërë thirrje qeverisë për ndërprerje të veprimeve të njëanshme.

“Ne i bëjmë thirrje qeverisë së Kosovës që të ndërpresë çdo veprim të mëtejshëm të njëanshëm dhe t’i kthehet angazhimit konstruktiv në Dialogun e lehtësuar nga BE-ja për të zgjidhur çështjet që kanë të bëjnë me normalizimin e marrëdhënieve ndërmjet Kosovës dhe Serbisë.”, njofton ambasada./Arbresh.info/