Ministrja e Drejtësisë, Albulena Haxhiu së bashku me kryeministrin e vendit, Albin Kurti kanë vizituar Organizatën për Fëmijët pa Kujdes Prindëror – OFAP.

Ministrja Haxhiu dhe kryeministri Kurti në këtë vizitë, janë njoftuar për së afërmi me gjendjen e shërbimeve si dhe kanë diskutuar për politikat të cilat Qeveria e Kosovës po ndërmerr në kuadër të ngritjes së nivelit më të lartë të shërbimit, përcjell Arbresh.info.

Ministrja Haxhiu ka bërë të ditur se Qeveria është e përkushtuar të fuqizojë konceptin e strehimit familjar dhe konceptin e familjes strehues për fëmijët pa përkujdesje prindërore.

“Projektligji i ri për Shërbime Sociale dhe Familjare i cili është votuar në mbledhjen e djeshme të Qeverisë së Republikës së Kosovës, e trajton në mënyrë specifike strehimin familjarë si formën më të mirë alternative të mbrojtjes, edukimit, strehimit dhe përkujdesjes për fëmijët”, tha Haxhiu.

Poashtu, në njoftimin e bërë në Facebook, thuhet se me datë 01.06.2023 Ministria e Drejtësisë ka nënshkruar vendimin përmes së cilit sigurohet mbështetje financiare për rreth 200.000 euro në vit më shumë për fëmijët të cilët gjenden në strehim familjar.

“Kjo rritje e pagesës siguron mirëqenie më të avancuar të fëmijëve dhe fuqizon konceptin e familjes strehuese si një ndër format më të mira të mbrojtjes së fëmijëve pa kujdes prindëror. Përkushtimi i ynë si Qeveri do të vazhdojë që shërbimet sociale dhe familjare të zënë vend të merituar në agjendën shtetërore”, përfundon Haxhiu./Arbresh.info/