Një burrë nga Kalifornia, i cili kaloi më shumë se tre dekada pas hekurave për një vrasje që nuk e kreu, u shfajësua nga krimi, duke hapur rrugën për lirimin e tij nga burgu, shkruan NBC News.

Joaquin Ciria, i cili tani është 61 vjeç, u arrestua në vitin 1990 dhe u dënua për vrasje me armë zjarri në San Francisko bazuar në dëshmitë e rreme dhe sjelljen e keqe të policisë, tha prokurorja e qarkut të San Franciskos, Chesa Boudin, e cila pushoi çështjen kundër Ciria.

Çështja e Ciria shënoi shfajësimin e parë të nxitur nga Komisioni i Pafajësisë së Prokurorit të Rrethit, i cili u krijua nga Boudin më 2020 për të shqyrtuar rastet e mundshme të dënimit të gabuar.

Ciria u dënua për vrasje të shkallës së parë me burgim të përjetshëm për vrasjen me armë zjarri të Felix Bastarrica, i cili u qëllua në kokë pas një debati në një rrugicë të San Franciskos.