Ngecja e Ballkanit në rrugën drejt anëtarësimit në BE, sipas Presidentit Stevo Pendarovski do të thotë “përvetësim i terrenit” nga forcat nacionaliste.

Në intervistë për gazetën greke “Katimerini” ai shton se në vend rriten dyshimet se pas vetos greke, kërkesës franceze për metodologji të re, tani edhe kërkesës bullgare – qëndrojnë fuqi më të mëdha që nuk e dëshirojnë Ballkanin në familjen evropiane.

Anulimi i gjatë i rrugës evropiane të vendeve të Ballkanit Perëndimor, ngre dyshime te qytetarët se rajoni nuk është i mirëseardhur në BE, kështu që mendohet për alternativa, ka deklaruar Presidenti Stevo Pendarovski për greken Katimerini.

Stevo Pendarovski, President i Republikës së Maqedonisë së Veriut

“Evropianët rrallëherë kanë pasur qëndrim të përbashkët, për shumë çështje. Në qoftë se i pyesni njerëzit nëse BE-ja vërtetë e mendon atë që e thotë, se një ditë do ta realizojë integrimin e të gjithëve, shumica do të thonë “jo”. Për shkak të këtiij hendeku, gajtë vitit të kaluar mbështetja për integrimin evropian në vendin tim është ulur për 20%, prej 85% ka rënë në pothuajse 65-67%”, ka thënë Pendarovski

Rajoni i nënshtrohet ndikimit të lojtarëve jashtë rajonit, shton Pendarovski, duke e theksuar si shembull për ndikimin e tyre referendumin për emrin e vendit në vitin 2018, kur u rritën sugjerimet se nuk nevojitet anëtarësim në NATO dhe në BE.

Stevo Pendarovski, President i Republikës së Maqedonisë së Veriut

“Kemi marrë ndihmë nga Aleanca e NATO-s. Në shtator të vitit 2018, ekspertë nga Pentagoni erdhën në Shkup, së bashku me ish sekretarin e mbrojtjes Xhejms Matis, që të ndihmojnë në përballjen me këtë ndikim qëllimkeq. Në përgjithësi, lojtarët jashtërajonalë e udhëheqin gjithë këtë propagandë politike përmes përfaqësuesve rajonalë”.

Në rast të ndryshimit të pushtetit të Maqedoninë e Veriut, Pendarovski, në intervistë për Katimerini shpreh optimizëm se opozita aktuale do ta respektojë Marrëveshjen e Prespës me Greqinë.