Lideri i Aleancës për Ardhmërinë e Kosovës, Ramush Haradinaj, thotë se shteti i Kosovës gjatë ditës së djeshme i ka marrë dy goditje të rënda, duke i kërkuar kështu kryeministrit, Albin Kurti, të jap dorëheqje.

“Dje është nënshkruar një marrëveshje që e kthen Kosovën 10 vjet prapa dhe është refuzuar projekti i gazsjellësit amerikan, me të cilin rrezikohet edhe Kosova edhe interesat amerikane në Ballkan”, deklaroi Haradinaj para medieve.

Sipas tij, me marrëveshjen e djeshme pala kosovare është pajtuar që njësitë elite të policisë së Kosovës, të trajtohen njëjtë sikur bandat kriminale në veri.

Haradinaj refuzimi i gazsjellësit amerikan nga ana e Qeverisë ndaj këtij projekti të interesit gjeostrategjik e gjeopolitik për Kosovën është goditje e drejtpërdrejt ndaj shtetit, partneritetit Kosovë-ShBA dhe interesave amerikane në Ballkan.

Fjalimi i plotë i Haradinajt në konferencë për medie:

“Shteti i Kosovës gjatë ditës së djeshme i ka marrë dy goditje të rënda. Më të rëndat që nga shpallja e pavarësisë. Dhe këto goditje kanë ardhur jo nga jashtë, jo nga armiqtë tanë, po nga kolona e pestë e Shtetit të  Kosovës. Nga një Qeveri dhe një Kryeministër kukull e i papërgjegjshëm.

Dje është nënshkruar një marrëveshje që e kthen Kosovën 10 vjet prapa dhe është refuzuar projekti i gazsjellësit amerikan, me të cilin rrezikohet edhe Kosova edhe interesat amerikane në Ballkan.

Me marrëveshjen për targat, Albin Kurti e ka goditur fort sovranitetin e vendit dhe karakterin unitar të shtetit.

Ka vendosur që t’i rikthejë targat ilegale të Serbisë, të cilat i kemi pas hequr këtu e 10 vjet më parë.

Ka vendosur që territorin e veriut të Kosovës, ta trajtoj ndryshe nga pjesa tjetër e Shtetit, dhe nuk e ka këtë të drejtë. Sepse nuk ia lejon as Kushtetuta e as Populli.

Është pajtuar që njësitë elite të policisë së Kosovës, të trajtohen njëjtë sikur bandat kriminale në veri. Tërheqjen e këtyre bandave e ka njëjtësuar me tërheqjen e policisë së Shtetit.

Është pajtuar që t’i tërheqë njësitë policore nga një e katërta e territorit të vendit, dhe këtë kompetencë t’ia kalojë KFOR-it, që ka mandat ushtarak dhe jo civil të ruajtjes së rendit e të sigurisë së brendshme dhe kështu ta kthejë Kosovën në kohën parapavarësisë.

Ky njeri e ka bërë hisedar Serbinë dhe ka pranuar t’i negociojë me të punët e brendshme të Kosovës.

Për të mos ngelur vetëm me kaq, ky njeri po ditën e djeshme ka marrë vendimin më antishqiptar e më antiamerikan në historinë e Kosovës.

Ka vendosur t’i thotë Jo gazsjellësit amerikan.

Refuzimi i Qeverisë ndaj këtij projekti të interesit gjeostrategjik e gjeopolitik për Kosovën është goditje e drejtpërdrejt ndaj shtetit, partneritetit Kosovë-ShBA dhe interesave amerikane në Ballkan.

Është hapje e derës për gazin rus dhe për Rusinë.

Hala më keq, ky kryeministër me sejmenët e tij, i kanë dhënë të drejtë vetes edhe me njollosë këtë projekt duke e cilësuar atë si projekt RUS. Do të thotë Amerika i paska dhënë 200 milionë për ta sjellë Rusinë në Kosovë.

Edhe marrëveshjen për targat edhe me JO-në për gazsjellësin amerikan, ky njeri ka nisur epokën anti-Kosovë dhe anti-Amerikë, por ju siguroj se nuk do të ketë sukses.

Kam një pyetje edhe për Presidenten e vendit. Pse po hesht për refuzimin shtetëror të projektit amerikan te gazsjellësit. Kjo heshtje e bën këtë goditje edhe më të dhimbshme dhe frikësuese.

Jo më shumë se 2 javë më parë, ajo pat thënë se: “Kosova s’ka refuzim. Kosova s’mund të ketë rrugëdalje tjetër, përpos bashkëpunimit me SHBA-të”.

E çka ndodhi tash. Sqarojeni popullin kah jeni nisur.

Të nderuara media, të nderuar qytetarë të Kosovës,

Albin Kurti me dy veprimet e fundit e ka rrezikuar Shtetit e Kosovës. E ka rrezikuar partneritetin tonë me Shtetet e Bashkuara. E ka shkelur betimin e tij si kryeministër për mbrojtje të sovranitetit të vendit.

Ky njeri i ka plotësuar të gjitha kushtet të japë dorëheqje. Mbetja e tij në këtë detyrë qoftë edhe për një ditë të vetme, është e dëmshme dhe e rrezikshme për Republikën e Kosovës.

Unë me kohë e kam vërejtur se është mashtrues dhe kam dyshuar se është i rrezikshëm për vendin. Për atë arsye e kam pyetur: kush je ti, a mos je i zënë peng dhe kah po e çon Kosovën? Sot, dyshimet e mia se ai është i dëmshëm dhe i rrezikshëm për vendin, u vërtetuan.”/arbresh.info/