Një akademik nga Tajvani është burgosur për katër vjet në Kinë me akuzat për “spiunazh”, transmeton Anadolu Agency (AA).

Mediat lokale raportuan se Zyra e Çështjeve të Tajvanit e Kinës njoftoi se Tony Shih u dënua për “spiunazh” nga një gjykatë në provincën Anhui të Kinës.

56-vjeçari Shih, i cili doli në pension si profesor i asociuar nga Universiteti Kombëtar i Tajvanit, u ndalua në Pekin për përfshirje të dyshuar në “aktivitetet kriminale që rrezikojnë sigurinë kombëtare të Kinës” që nga gushti i vitit 2018.

Autoritetet kineze transmetuan “rrëfimin” e tij në televizionin shtetëror në mes të tetorit në të cilin Shih “pranoi” se ai “me vite me radhë mblodhi informacione të inteligjencës për qeverinë e Tajvanit”.

Shih ishte një akademik i njohur i Tajvanit dhe miqësor ndaj Kinës.

Tre “spiunë” të tjerë të Tajvanit po ashtu “rrëfyen”. Ata janë këshilltari i qeverisë lokale, Lee Meng-chu, akademiku Cheng Yu-chin dhe kryetari i Shoqatës së Marrëdhënieve të Tajvanit Jugor, Tsai Chin-shu.

Kina e pretendon Tajvanin si një “provincë të shkëputur”, megjithatë Tajvani këmbëngul se është i pavarur që nga viti 1949 dhe ka vendosur marrëdhënie diplomatike me të paktën 16 vende dhe rajone.

Së fundmi, administrata amerikane nën presidentin Donald Trump u përqendrua në forcimin e marrëdhënieve dypalëshe me Tajvanin, që rezultoi në përkeqësimin e mëtejshëm të lidhjeve midis Pekinit dhe Uashingtonit.