Në tre vitet e fundit, Maqedonia e Veriut ka vendosur të kthejë seriozisht faqe të reja në historinë e saj. Ne kemi dalë nga një krizë e thellë politike dhe kemi rivendosur institucionet demokratike dhe sundimin e ligjit. Ne kemi dhënë rezultate konkrete dhe të qëndrueshme në zbatimin e reformave të BE-së dhe marrëdhënieve të fqinjësisë së mirë. Ne jemi bërë anëtare e 30-të e NATO-s dhe nën udhëheqjen tuaj ne kemi vendosur të fillojmë bisedimet e pranimit në BE, tha kryeministri Oliver Spasovski në fjalimin e tij në video-konferencën e Samitit të BE-së për Ballkanin Perëndimor – Zagreb 2020, përcjell Telegrafi Maqedoni.

Kryeministri Spasovski së bashku me zv. kryeministrin për Çështje Evropiane Bujar Osmani dhe Ministrin e Punëve të Jashtme Nikolla Dimitrov morën pjesë në punën e Samitit të mbajtur këtë vit të organizuar nga Kroacia, si vend president i Bashkimit Evropian.

Duke iu drejtuar Spasovskit, cituar nga shërbimi për shtyp i qeverisë, Kryeministri tha se ne jemi të gatshëm për hapat e ardhshëm dhe, siç tha ai, ne do të punojmë me Komisionin dhe Këshillin e BE-së që të caktojmë konferencën e parë ndërqeveritare sa më shpejt që të jetë e mundur e cila do të thotë që edhe praktikisht bëhemi pjesë e procesit të negociatave në përputhje me metodologjinë e re.

“Do të doja të shfrytëzoja këtë mundësi për t’ju siguruar që Maqedonia e Veriut do të mbetet e përkushtuar ndaj reformave themelore dhe do të vazhdojë të kontribuojë në sigurinë evropiane. Marrëveshja e Prespës me Greqinë dhe Marrëveshja e Miqësisë me Bullgarinë janë investimi ynë në të ardhmen e përbashkët evropiane dhe do të jetë jashtëzakonisht e rëndësishme që të vazhdojmë t’i zbatojmë ato me vullnet të mirë nga ana jonë dhe nga vendet anëtare të prekura”, tha Spasovski.