Nënkryetari i LDK-së, Lutfi Haziri ka deklaruar se pavarësisht asaj se a do ta udhëheq apo jo LDK-ja qeverinë e re, kjo parti ka një pozitë kushtetuese.

“LDK e ka një pozitë kushtetuese, e ajo është pozita e kryetares së Kuvendit të Kosovës”, tha Haziri.

Haziri shtoi se pozita e Vjosa Osmanit nuk mund të cenohet në rrethanat e reja politike.

“Vjosa Osmani e ka besimin e partnerëve të koalicionit që edhe sot, përkundër që qeveria ka humb besimin ajo mbetet kryetare e Kuvendit në besim, dhe pozita e saj nuk mund të cenohet në rrethanat e reja politike”, ka thënë Haziri në një intervistë për telegrafi.com.

Nënkryetari i LDK-së, ka folur edhe për çështje tjera, konkretisht për bashkëpunimin që LDK mund ta ketë me partitë e tjera në rast se presidenti Thaçi ia jep mandatin për formim të Qeverisë.

Në këtë aspekt, Haziri ka shtuar se LDK është e gatshme të bashkëpunoj me cilëndo parti përveç PDK-së.