Presidenti i Kosovës, Hashim Thaçi, është deklaruar nga Mynihu, pas mbajtjes së një takimi ku në panel ka qenë edhe Shefi për Politikë të Jashtme të BE-së, Josep Borrell.

“Ishte një mundësi shumë e mirë që të prezantohet të arriturat dhe aspiratat e Kosovës për të ardhmen. Në këtë takim ishte Josep Borrell me të cilët biseduam për hapat e mëtutjeshëm të Kosovës dhe Ballkanit Perëndimor”, është shprehur Thaçi, transmeton Klan Kosova.

“Theksova se Kosova ndihet e mashtruar nga BE për mosliberalizim të vizave. Duhet të ndryshohet kjo qasje. Nuk po kërkojmë dhuratë. I kemi implementuar të gjitha kriteret. Është një gabim strategjik i BE-së dhe një qasje e padrejtë ndaj qytetarëve të Kosovës”.

“Angazhimi tjetër është ajo rreth dialogut mes Kosovës dhe Serbisë që duhet të përmbyllet me njohje reciproke. Viti i kaluar ka qenë më optimist se sivjet që të arrihet diçka konkrete. Duam nga BE të jetë unike dhe shtetet anëtare ta mbështesin procesin e dialogut dhe ky proces të jetë i lidhur ngushtë me SHBA-në”

Thaçi ka folur edhe për marrëveshjen e nënshkruar sot në mes të Kosovës dhe Serbisë.

“Kjo marrëveshje është mes dy vendeve – dy shteteve të pavarura dhe sovrane. Është një marrëveshje që përfshin çështje lokale, regjionale dhe ndërkombëtare që ndërlidhen me sistemin hekurudhor”.