Shefi i zyrës për Kosovën në qeverinë serbe, Marko Gjuriq, të dielën bëri të ditur se Lista Serbe do të marrë pjesë në institucionet e Kosovës, pavarësisht se nuk do ta mbështesë qeverinë.

“Nuk ka kushte që Lista Serbe ta votojë qeverinë e re, por do të marrë pjesë në institucione dhe do ta përmbushë mandatin e vet”, ka thënë Gjuriq. Megjithatë, nuk dihet nëse sot ka ndryshuar ky disponim.

Sipas këtyre deklarimeve nënkuptohet se Lista Serbe do të kërkojë votat për dy ministrat e saj, por nuk do të votojë qeverinë e Albin Kurtit.

Kryetari i Listës Serbe, Goran Rakiq ka deklaruar të dielën në Beograd pas konsultimeve me Qeverinë e Serbisë së subjekti politik që ai përfaqëson është ftuar vetëm njëherë në konsultime për Qeverinë e re të Kosovës.

“Kemi mësuar nga mediat se është arritur njëfarë koalicioni dhe kemi vendosur të mos e përkrahim atë qeveri ngase i besojmë vetëm Beogradit”, ka thënë Rakiq, pas takimit me kryeministren serbe Ana Bërnabiq dhe shefin e zyrës për Kosovën në qeverinë serbe, Marko Gjuriq./arbresh.info/