Një zyrtar i partisë Italiane Lega të udhëhequr nga Mateo Salvini, Vito Komencini, thotë se kjo parti do të kthehet në pushtet në Itali dhe do të rishqyrtojë vendimin për njohjen e Kosovës.

Ai vlerësoi se Kosova ishte një problem i madh, madje për tërë Evropën, transmeton portali arbresh.info.

Tutje deputeti nga partia kontroverse ka thënë se në Kosovë ka trafik droge e trafikim të organeve.

“Ka trafik droge, trafikim të organeve njerëzore, terroristë islamikë, të kthyer. Pozicioni ynë është që ta mbështesim Serbinë në çdo mënyrë të mundshme”, tha Komencini për Telegraf Serbia.

Ai shtoi se me siguri do të rishqyrtojë vendimin për “njohjen e Kosovës”.

Komencini është një nga bashkëpunëtorët më të afërt të Mateo Salvinit, politikanit më kontrovers në Itali, i cili është kritikuar shumë për qëndrimet e tij, sidomos ndaj emigrantëve./arbresh.info/