Çmimet e naftës së papërpunuar kanë vazhduar të bien pasi Arabia Saudite ka rikthyer pjesën më të madhe të prodhimtarisë në nivelet e para sulmeve, duke u dhënë fund shqetësimeve se furnizimi botëror me naftë do të mbetet i ulët për pjesën e mbetur të vitit.

Nafta Brent tregtohej për 62.28 dollarë për fuçi, duke shënuar ulje prej 0.48, ndërsa nafta WTI u tregtua për 56.19 dollarë për fuçi apo 0.15 për qind më pak.

Prodhimi i naftës në Arabinë Saudite u rrit shumë më lartë se sa parashikohej, andaj shkaktoi rënien e çmimeve, përcjell Telegrafi.

Prodhimtaria e naftës në dy fabrikat kyçe të Saudi Aramco tani është 6.2 milionë fuçi në ditë, në krahasim me nivelin para sulmeve prej 7 milionë fuçi në ditë.

Po ashtu, u raportua se Arabia Saudite ka rikthyer pjesën më të madhe të prodhimtarisë në nivelin para sulmeve në rafineritë e naftës në Abqaiq dhe në fushën e naftës Khurais.

Ditë më parë, pas një sulmi në rafineritë e naftës në Arabinë Saudite, çmimet e naftës u rritën deri në 20 për qind të vlerës, gjë që është rritja më e lartë që nga Lufta e Gjirit në vitin 1991. /Telegrafi/