Granit Xhaka i ka ofruar shiritin e kapiteni te Zvicra anësorit Xherdan Shaqiri.

Ylli i Liverpoolit ka refuzuar ftesën e kombëtares së Zvicrës për ndeshjet e shtatorit në kuadër të kualifikimeve dhe gazeta zvicerane Blick raporton se arsyeja prapa kësaj është shiriti i kapitenit, transmeton portali arbresh.info.

Shaqiri besohet t’i ketë kërkuar shiritin e kapitenit trajnerit Vladimir Petkovic, por kjo kërkesë e çuditshme është refuzuar. Në lidhje me këtë ka reaguar kapiteni kosovar i Zvicrës, Granit Xhaka duke ofruar një zgjidhje.

“Nëse me të vërtetë ky është problemi, ai mund ta ketë shiritin e kapitenit”, ka thënë fillimisht mesfushori i Arsenalit për gazetën e lartpërmendur.

“Për mua nuk ka rëndësi nëse e kam apo jo. Mundohem të kem ndikim te skuadra me ose pa shiritin e kapitenit”, shtoi tutje.

Zvicra barazoi në ndeshjen mbrëmjen e kaluar kundër Irlandës me rezultat 1 me 1.

Gjibraltari është rivali i ardhshëm i kombëtares zvicerane me shumë shqiptarë./arbresh.info/