Një përplasje diplomatike është verifikuar këtë të shtunë mes Italisë dhe Libisë, dikur dy vende me lidhje të forta ekonomike.

Shkak është bërë një reagim i qeverisë së Tripolit që ka bërë përgjegjëse direkte palën italiane për vrasjen e kryebosit të trafikut të qënieve njerëzore nga Lindja e Mesme drejt Evropës.

Salah Al Maskhout, në krye të një milicie të armatosur dhe i konsideruar nga mediat libiane si bosi i skafistëve, u ekzekutua një natë më parë në Tripoli nga një grup personash të armatosur, që nga mënyra e veprimit konsiderohen profesionistë.

Presidenti i Kongresit libian, Nuri Abu Sahmain ka akuzuar “forcat speciale italiane” për këtë vrasje.

Ndërkohë, mediat libiane, të cilat më herët raportuan për ekzekutimin e Maskhout, shkruajnë edhe për lidhje të bosit të trafikut me vetë kreun e Kongresit.

Nuk ka munguar ndërkohë reagimi i Romës zyrtare. Ministria e Jashtme e Italisë dhe e Mbrojtjes kanë mohuar përfshirjen e ushtarakëve italianë në vrasje.

Një përgënjeshtrim ka ardhur edhe nga shërbimet sekrete. “Në Libi nuk janë në zhvillim aktivitete të këtij lloji dhe kjo për faktin se nuk është pjesë e perimetrit operativ të agjentëve tanë”, thuhet në një komunikatë të cituar nga agjencia e lajmeve “ANSA”.tch