Në takimin për Strategjinë Kombëtare për të Drejtat e Njeriut, ku morën pjesë anëtarët për hartimin e kësaj strategjie, Sekretari i Përhershëm i Ministrisë së Integrimit Evropian, Kushtrim Cukaj, mbajti një ekspoze, me ç’rast vlerësoi se rregullimi i çështjeve pronësore-juridike përbën element shumë të rëndësishëm në zhvillimin e fushëveprimit të së drejtës civile në Kosovë, bëhet e ditur përmes një komunikate për media.

Rëndësi të veçantë, për sistemin juridik të Republikës së Kosovës, potencoi Cukaj, është Karta e të Drejtave Themelore e Bashkimit Evropian, e cila garanton të drejtën për të zotëruar, të përdorë, të disponojë ose të lërë trashëgimi pronën e tij apo të saj të fituar në mënyrë të ligjshme.

“E drejta e pronës dhe mbrojta e saj, përbën ndër parimet kryesore kushtetuese. Po ashtu, mbrojtja e pronës dhe ndalimi i privimit në mënyrë arbitrare nga prona janë të garantuara me kushtetutën e Republikës së Kosovës”, tha Cukaj, mirëpo ka shtuar ai, fuqizimi dhe zbatimi në praktikë i të drejtës pronësore në Kosovë është shoqëruar me sfida.

Qëllimi i Strategjisë Kombëtare për të Drejtat Pronësore, i ndërlidhur edhe së fundmi me përmbledhjen e Kodit Civil, përbëjnë një hap shumë të rëndësishëm në përmirësimin, qartësimin dhe ofrimin e sigurisë juridike për zbatimin e të drejtës pronësore në praktikë, vuri në dukje Sekretari i përhershëm i MIE, Kushtrim Cukaj.

Synimi i Strategjisë Kombëtare për të Drejtat Pronësore së bashku me dispozitat referuese të përmbledhura në Kodin Civil, theksoi Cukaj, janë garanci për fuqizimin e kësaj të drejte dhe implementimin e saj në praktikë për të gjithë qytetarët pa dallim, veçanërisht grave dhe vajzave.