Të gjitha ndeshjet e zhvilluara në kuadër të kualifikimeve në Kampionatin Evropian 2020 mbrëmjen e sotme (e premte) kanë përfunduar.

Kampioni i Botës, Franca mposhti me rezultat të thellë 4 me 1 në shtëpi skuadrën e Maldovës dhe golat u shënuan nga yjet si Kylian Mbappe, Antoine Griezmann, Raphael Varane dhe Olivier Giroud, shkruan portali arbresh.info.

Anglia ishte e pandalshme kundër Republikës së Çekisë duke e nisur me një fitore bindëse prej 5 me 0 rrugëtimin e tyre drejtë kualifikimit. Superylli Raheem Sterling realizoi hat-trick, Harry Kane shënoi nga pika e bardhë, ndërsa i fundit ishte autogol nga Tomas Kalas.

Portugalia e Cristiano Ronaldos barazoi pa gola në shtëpi kundër Ukrainës, ndërkohë që Luksemburgu fitoi 2 me 1 ndaj Lituanisë.

Islanda fitoi 2 me 0 ndaj Andorrës, ndërsa Bullgaria barazoi 1 me 1 ndaj Malit të Zi.

Ndeshjet e ardhshme në kuadër të kualifikimeve luhen në fillim të javës tjetër./arbresh.info/