Ministri i Mjedisit dhe Planifikimit Hapësinor Ferid Agani, ka pritur sot myftiun e Republikës së Kosovës, Naim Tërnavën, me të cilin ka biseduar për avancimin e bashkëpunimit ndërmjet dy institucioneve.

Agani ka falënderuar myftiun Tërnava për ligjëratën e organizuar nga BIK-u në të gjitha xhamitë e vendit, për nder të Ditës Botërore të Tokës, që për tematikë kishte rëndësinë e ruajtjes së mjedisit ku jetojmë dhe veprojmë.

Ai po ashtu ka shprehur përkushtimin e tij që të avancohet edhe më tutje bashkëpunimi ndërmjet BIK-ut dhe Ministrisë së Mjedisit dhe Planifikimit Hapësinor.

Myftiu Tërnava është shprehur i gatshëm të bashkëpunojë ngushtë me Ministrinë në të gjitha fushat që ndërlidhen me interesat e BIK-ut dhe qytetarëve të Republikës së Kosovës.

Kryetari i BIK-ut e ka njoftuar ministrin për zhvillimet e fundit që ndërlidhen edhe me vazhdimin e punimeve në xhaminë e Kalabrisë, duke pohuar se kjo çështje kërkon zgjidhje të menjëhershme, në të kundërtën tha se rrezikojnë me humbjen e donatorit që ka shprehur gatishmërinë për ndërtimin e kësaj xhamie.

Agani ka thënë se do të shikohen të gjitha mundësitë ligjore për zgjidhjen e kontestit të xhamisë në Kalabri, duke theksuar se kjo çështje ka mbetur peng e problemeve politike në Komunën e Prishtinës, e cila nuk po arrin ta miratojë në Kuvendin Komunal planin zhvillimor, në të cilën përfshihet edhe ndërtimi i xhamisë në fjalë, thuhet në komunikatën e MMPH